Dyma'ch diweddariad dydd Mawrth, sy'n cynnwys:

• Cyngor teithio ar gyfer Cymru yn erbyn Iwerddon ar 22 Chwefror yng Nghaerdydd
• Cynllun beics yn helpu plant mewn teuluoedd incwm isel i ddewis teithio llesol i'r ysgol
• Grantiau cyngor yn helpu gyrwyr tacsi Caerdydd i dorri allyriadau
• Dweud eich dweud - Mae Ymarfer Ymgysylltu Pythefnos am Leoedd Diogel i Barcio Beiciau

Cyngor teithio ar gyfer Cymru yn erbyn Iwerddon ar 22 Chwefror yng Nghaerdydd

Bydd Cymru yn herio Iwerddon ddydd Sadwrn 22 Chwefror yn Stadiwm Principality.

Gyda'r gic gyntaf am 2.15pm - bydd ffyrdd canol y ddinas ar gau o 10.15am tan 5.45pm i sicrhau bod pob un sydd â thocyn yn gallu mynd i mewn ac allan o'r stadiwm yn ddiogel.

Mae disgwyl i draffordd yr M4 fod yn brysur iawn oherwydd y gêm rygbi, felly cynlluniwch ymlaen llaw i osgoi'r tagfeydd yng Nghaerdydd drwy ddefnyddio'r cyfleusterau parcio a theithio ym maes parcio hen safle Toys R Us yn y Pentref Chwaraeon - CF11 0JS.

Gallwch chi weld gwybodaeth gyfredol am y draffordd a chefnffyrdd ar  wefan Traffig Cymru, neu @TrafficWalesS ar Twitter a Facebook.

Bydd y gatiau'n agor am 12.15pm, cynghorir y rhai sy'n mynychu'r gêm rygbi yn gryf i gynllunio eu taith a mynd i mewn yn gynnar.   Darllenwch y rhestr o eitemau gwaharddedig yn  principalitystadium.cymru, yn arbennig y polisi bagiau (dim bagiau mawr) cyn teithio i'r ddinas.

Darllenwch fwy yma

Cynllun beics yn helpu plant mewn teuluoedd incwm isel i ddewis teithio llesol i'r ysgol

Mae plant mewn teuluoedd incwm isel yng Nghaerdydd yn elwa o gynllun newydd sy'n darparu beics wedi'u hailgylchu am ddim.

Mae'r cynllun Beics i Blant yn rhan o ymateb Caerdydd Un Blaned y Cyngor i newid hinsawdd a'i nod yw galluogi mwy o blant i deithio'n llesol i ac o'r ysgol trwy oresgyn y rhwystr o'r gost o brynu beic.

Nid oes angen y beics a roddir i'r cynllun ar y perchnogion mwyach, ond yn hytrach na mynd i wastraff maen nhw'n cael eu hadnewyddu gyda darnau wedi'u hailgylchu, yn barod i'w defnyddio eto.

Ers ei lansio ym mis Medi 2024, mae 72 o ddisgyblion wedi derbyn beic drwy'r cynllun.  Mae pob disgybl hefyd yn cael helmed, clo beic, pwmp, hyfforddiant cynnal a chadw beics sylfaenol, a hyfforddiant beicio.

Darllenwch fwy yma

Grantiau cyngor yn helpu gyrwyr tacsi Caerdydd i dorri allyriadau

Os byddwch yn cael tacsi yng Nghaerdydd heddiw, gallai eich taith fod yn lanach ac yn wyrddach oherwydd cynllun gan Gyngor Caerdydd sydd wedi darparu mwy na £200,000 o grantiau i alluogi gyrwyr tacsi'r ddinas i uwchraddio i gerbydau mwy effeithlon o ran tanwydd neu i gerbydau cwbl drydan.

Bob blwyddyn mae gyrrwr tacsi llawn amser arferol yn y DU yn gwneud rhwng 25,000 a 45,000 milltir o yrru1 - yn sylweddol fwy na'r 7,500 milltir2 ar gyfartaledd y mae gyrrwr cyffredin yn y DU yn ei wneud. Mae fflyd Cerbydau Hacni Caerdydd yn cynnwys llawer o gerbydau disel Euro 4 ac Euro 5 hŷn, sy'n golygu bod llawer o'r milltiroedd hynny'n cael effaith negyddol ar y blaned, ac ansawdd aer lleol.

Yn amrywio o £5,000 - £10,000 y cerbyd, mae'r grantiau'n cefnogi gyrwyr i brynu cerbydau Euro 6, sydd yn fwy modern ac effeithlon o ran tanwydd, yn ogystal â cherbydau cwbl drydan.

Mae'r grantiau'n rhan o ymateb Caerdydd Un Blaned y Cyngor i newid yn yr hinsawdd sydd wedi arwain at gyflwyno fferm solar newydd, plannu 100,000 o goed newydd, adeiladu tai cyngor ynni-effeithlon, carbon isel, a gosod rhwydwaith cynyddol o feicffyrdd ar wahân, ochr yn ochr ag amrywiaeth eang o brosiectau a mentrau eraill.

Darllenwch fwy yma

Dweud eich dweud - Mae Ymarfer Ymgysylltu Pythefnos am Leoedd Diogel i Barcio Beiciau

Mae ymarfer ymgysylltu pythefnos wedi dechrau - gan ofyn i'r holl feicwyr am eu barn ar gyfleusterau diogel i barcio beiciau yn y ddinas.

Mae'r arolwg ar-lein yn gofyn i feicwyr am eu barn ar wahanol atebion a thaliadau posibl am opsiynau parcio diogel. I gymryd rhan, cliciwch yma:
www.caerdydd.gov.uk/parciodiogelifeiciau 

Bydd y cynllun newydd yn canolbwyntio ar ganol y ddinas, Cathays, Grangetown a Bae Caerdydd yn y lle cyntaf, ond bwriedir iddo dyfu o ganol y ddinas, tuag allan, i ardaloedd siopa lleol ar draws Caerdydd.

Bydd yr arolwg ar-lein yn cau ar 3 Mawrth, er mwyn sicrhau y gellir cymryd yr holl gamau angenrheidiol i osod cam cyntaf y cynllun yn ystod haf 2025.

Darllenwch fwy yma