16.7.24

Mae ugain o barciau a mannau gwyrdd sy'n cael eu rheoli gan Gyngor Caerdydd wedi derbyn Baneri Gwyrdd gwerthfawr, gan gynnwys, am y tro cyntaf, Parc Cathays yng nghanolfan ddinesig hanesyddol Caerdydd a Pharc y Brag yn y Sblot, sydd newydd ei adnewyddu.

Wedi'i uwchraddio'n ddiweddar fel rhan o raglen fuddsoddi gwerth £3 miliwn ym mharciau Caerdydd, mae Parc y Brag bellach yn cynnwys ardal chwarae naturiol, parc sglefrfyrddio ac ardal gemau aml-ddefnydd, ochr yn ochr â choed newydd a dolydd. Mae delweddau hanesyddol o'r Sblot, ardal o'r ddinas sydd â rhai o'r lefelau amddifadedd uchaf a'r lefelau isaf o fannau gwyrdd fesul pen, hefyd wedi'u hymgorffori yng nghynllun y parc.

Plentyn yn mwynhau'r cyfleusterau sglefrfyrddio ym Mharc y Brag yn y Sblot (credyd Cyngor Caerdydd).

Yng nghanol hanesyddol y ddinas, mae Parc Cathays, sy'n cynnwys Gerddi Alexandra, Gerddi'r Orsedd, apharc newydd Mackenzie- a enwyd er anrhydedd i'r Athro benywaidd cyntaf yng Nghymru, Millicent Mackenzie - hefyd wedi cyflawni'r nod ansawdd rhyngwladol uchel-ei-barch am y tro cyntaf.

Parc Mackenzie yng Nghanolfan Ddinesig hanesyddol Caerdydd (credyd Cyngor Caerdydd).

Mae'r gwobrau, sy'n cydnabod parciau a mannau gwyrdd mewn 20 o wledydd ar draws y byd, yn cael eu rhedeg yng Nghymru gan yr elusen amgylcheddol Cadwch Gymru'n Daclus ac yn cael eu beirniadu'n annibynnol yn erbyn ystod o feini prawf llym, gan gynnwys: bioamrywiaeth, cyfranogiad cymunedol, glendid a rheolaeth amgylcheddol.

Dywedodd y Cynghorydd Jennifer Burke, yr Aelod Cabinet dros Ddiwylliant, Parciau a Digwyddiadau:  "Mae cael 20 o Faneri Gwyrdd yn hedfan yng Nghaerdydd yn gyflawniad gwych.  Mae cymaint o waith yn cael ei wneud i gynnal a gwella'r mannau hyn - mae ein timau cyngor ymroddedig allan boed law neu hindda, yn gweithio ochr yn ochr â grwpiau cyfeillion a gwirfoddolwyr anhygoel. Mae pawb yn haeddu diolch enfawr.

"Mae mannau gwyrdd o ansawdd da yn bwysig iawn i iechyd a lles cymunedau - ac rwy'n arbennig o falch bod Parc y Brag yn y Sblot wedi llwyddo i ennill Baner Werdd am y tro cyntaf, ochr yn ochr â Pharc Cathays yng nghanolfan ddinesig drawiadol Caerdydd."

Gwnaeth 18 o fannau gwyrdd eraill y Cyngor yng Nghaerdydd - gan gynnwys tair mynwent, ynys, a dwy warchodfa natur, hefyd gadw eu Baneri Gwyrdd presennol.

Dywedodd yr Aelod Cabinet sy'n gyfrifol am Wasanaethau Profedigaeth, y Cynghorydd Norma Mackie:  "Mae Baneri Gwyrdd mynwentydd y Gorllewin, Cathays a Draenen Pen-y-graig yn gydnabyddiaeth haeddiannol am yr holl waith caled sy'n cael ei wneud a'r holl ofal a sylw sy'n cael ei roi i gadw'r mannau myfyrio pwysig hyn ar eu gorau i drigolion ac ymwelwyr."

Dyma'r rhestr lawn o safleoedd a reolir gan Gyngor Caerdydd a enillodd Faner Werdd eleni:

Parc Bute, Morglawdd Bae Caerdydd, Gwarchodfa Gwlyptir Bae Caerdydd, Mynwent Cathays, Parc Cathays (Gerddi Alexandra, Gerddi'r Orsedd a Pharc Mackenzie), Ynys Echni, Fferm y Fforest, Gerddi'r Faenor, Parc Hailey, Parc y Mynydd Bychan, Llyn Hendre, Parc y Brag, Parc Cefn Onn, Parc Tredelerch, Parc y Rhath, Gerddi Bryn Rhymni, Mynwent Draenen Pen-y-graig, Parc Fictoria, Gerddi Waterloo a Mynwent y Gorllewin.

Dywedodd Lucy Prisk, Cydlynydd Baner Werdd Cadwch Gymru'n Daclus: "Rydym wrth ein bodd o weld bod 20 o fannau gwyrdd a reolir gan Gyngor Caerdydd wedi cyflawni statws nodedig y Faner Werdd, sy'n dyst i ymroddiad a gwaith caled cannoedd o staff a gwirfoddolwyr. 

"Mae mannau gwyrdd o safon yn chwarae rhan hanfodol yn lles corfforol a meddyliol pobl ledled Cymru, ac mae cael ein cydnabod fel un o'r goreuon yn y byd yn gyflawniad enfawr - llongyfarchiadau!" 

Ychwanegodd y Cynghorydd Burke: "Hoffwn hefyd longyfarch yr holl grwpiau cymunedol ledled Caerdydd, y mae eu hymrwymiad i'w mannau gwyrdd lleol wedi gweld 23 o Wobrau Cymunedol y Faner Werdd yn cael eu rhoi yn y ddinas eleni."

Gwobrau eraill y Faner Werdd yng Nghaerdydd

Derbyniodd Amgueddfa Werin Sain Ffagan, a reolir gan Amgueddfa Genedlaethol Cymru, wobr lawn y Faner Werdd hefyd, yn ogystal â Chronfeydd Dŵr Llys-faen a Llanisien Dŵr Cymru, sydd newydd gael eu hailagor.

Bu grwpiau cymunedol ar draws y ddinas hefyd yn llwyddiannus wrth sicrhau Gwobrau Cymunedol y Faner Werdd. Rhoddwyd gwobrau i: Ardd Canolfan Beulah, Gardd Gymunedol Chapter, Coed y Felin, Gardd Goffa Dusty Forge, Rhandir Cymunedol Fferm y Fforest, Prosiect Gerddi Byd-eang, Gardd Fwyd Grangetown, Tyfu'n Dda Glan-yr-afon, Gwarchodfa Natur Leol Howardian, Gardd Llawfeddygaeth Lansdowne, Gerddi Llwynfedw, Caeau Chwarae a Pharc Cymunedol Pentref Llaneirwg, Gardd Gymunedol Maes y Coed, Coetiroedd Cymunedol Nant Fawr, Rhandiroedd Pafiliwn Pengam, Gardd Gymunedol Plasnewydd, Gardd Rheilffordd, Gardd Gymunedol Glan-yr-afon, Rhandir Cymunedol StarGarAllot, Gardd Gymunedol Llaneirwg, Gardd Pantri Llaneirwg, Gardd Gymunedol San Pedr, a Gardd Gymunedol yr Eglwys Newydd.