29/04/22

Dyma'r diweddariad diweddaraf gan Gyngor Caerdydd, yn ymwneud â: chynllun peilot 20mya Llywodraeth Cymru mewn pedair ward yng Ngogledd Caerdydd; Pennaeth a Dirprwy Bennaeth o Gaerdydd sydd wedi ennill gwobr yng Ngwobrau Cenedlaethol Cymru; y digwyddiad ‘Dreamachine' am ddim sy'n dod i Gaerdydd ym mis Mai a'r coronafeirws nifer wrth nifer.

Mae pedair ward yng Nghaerdydd wedi'u dewis i fod yn rhan o dreial gan Lywodraeth Cymru i leihau'r terfyn cyflymder cenedlaethol o 30mya i 20mya mewn ardaloedd preswyl.

Mae Ystum Taf, yr Eglwys Newydd a Thongwynlais, Rhiwbeina a'r Mynydd Bychan i gyd wedi cael eu dewis i fod yn rhan o gynllun Cam 1 20mya Llywodraeth Cymru.

Bydd hyn yn golygu y bydd holl strydoedd preswyl y wardiau hyn yn cael eu cyfyngu i 20mya pan gaiff y cynllun ei weithredu, ond bydd y terfyn cyflymder ar Ffordd y Faenor a Rhodfa'r Gorllewin yn parhau yn 30mya. Disgwylir i'r cynllun gael ei weithredu'n llawn erbyn 14 Mai.

Mae holl drigolion a busnesau'r ardaloedd hyn wedi derbyn taflen wybodaeth am y cynllun, gan fod Caerdydd yn un o wyth ardal yng Nghymru sy'n helpu Llywodraeth Cymru i asesu'r ffordd orau o symud i derfyn cyflymder o 20mya mewn ardaloedd preswyl. Mae hwn yn newid cenedlaethol a fydd yn digwydd ledled Cymru yn 2023.

Mae Pennaeth Ysgol Gynradd Llansdowne, Michelle Jones a'i Dirprwy Bennaeth, Catherine Cooper wedi ennill y wobr gyntaf yng Ngwobrau Dewi Sant, sef gwobrau cenedlaethol Cymru.

Derbyniodd y ddau uwch arweinydd y wobr yn y categori Gweithiwr Allweddol Hanfodol am y cymorth a ddangoswyd ganddynt i deuluoedd yn eu hysgol yn ystod pandemig y coronafeirws.

Mewn enwebiad dienw ar gyfer gwobrau mawreddog Llywodraeth Cymru, disgrifiwyd Michelle a Catherine fel calon Ysgol Gynradd Lansdowne, gan ei gwneud yn gymuned ddiogel, gariadus, gefnogol ac uchelgeisiol.

Mae'r wobr yn cydnabod y gwaith diflino a wnaed gan Michelle a Catherine yn ystod y pandemig Covid-19 a sut yr aethant yr ail filltir i sicrhau bod plant a theuluoedd sy'n agored i niwed yn cael cymorth a chefnogaeth yn ystod cyfnod anodd iawn, gan weithio diwrnodau hir a rhoi eu bywydau personol eu hunain yn ail i gefnogi'r gymuned mewn amrywiaeth o ffyrdd.

Aeth yr enwebiad ymlaen i ddweud sut yr oedd y pâr yn darparu cymorth a gofal plant i weithwyr allweddol a phlant sy'n agored i niwed gan gynnwys cludo plant i'r ysgol, darparu bwyd a hanfodion eraill i deuluoedd a sicrhau eu bod ar gael 24/7 i gynnig cymorth a chyngor i'r gymuned.

Yn ystod y cyfnod hwn, daeth yr ysgol, o dan eu gofal, yn esiampl o ddiogelwch, a phwysodd y gymuned arnynt am gyngor, sicrwydd a chefnogaeth. Roedd lles staff yr ysgol hefyd yn eithriadol o bwysig iddynt a gwnaethant gydnabod yr effaith emosiynol ar holl gymuned yr ysgol. Gwnaethant hefyd ddarparu cymorth hanfodol i deuluoedd a brofodd golled yn ystod y pandemig.

Mae'n swnio fel rhywbeth allan o ffuglen wyddonol ond mae Dreamachine, gwaith celf am ddim yr ydych chi'n ei 'weld' gyda'ch llygaid wedi'u cau, yn real, mae'n dod i Caerdydd ym mis Mai ... a gallai eich syfrdanu! Mae'r profiad yn cynnwys taith drochi o oleuadau a sain sy'n cynhyrchu byd caleidosgopig sy'n agor y tu ôl i'ch llygaid, wedi'i greu gan eich ymennydd eich hun ac sy'n unigryw i chi. Bydd Dreamachine yn y Deml Heddwch yn Cathays rhwng 12 Mai a 18 Mehefin. I gael rhagor o fanylion ac i wybod sut i gael tocynnau am ddim, dilynwch y ddolen hon:https://www.stdavidshallcardiff.co.uk/dreamachine-immersive-experience-collective-act-and-unboxed-creativity-in-the-uk-presents-dreamachine/

Coronafeirws Nifer wrth Nifer

Diweddariad Statws Brechu Bwrdd Iechyd Prifysgol Caerdydd a'r Fro

Ddarparwyd y data gan Fwrdd Iechyd Prifysgol Caerdydd a'r Fro:

https://bipcaf.gig.cymru/covid-19/rhaglen-brechu-torfol-covid-19/

Achosion a Phrofion Caerdydd - Data'r 7 Diwrnod 18 Ebrill 2022 - 24 Ebrill 2022)

Yn seiliedig ar ffigurau diweddaraf Iechyd Cyhoeddus Cymru:

https://public.tableau.com/profile/public.health.wales.health.protection#!/vizhome/RapidCOVID-19virology-Public/Headlinesummary

Mae'r data'n gywir ar:

28 Ebrill 2022

Achosion: 143

Achosion fesul 100,000 o'r boblogaeth: 39.0 (Cymru: 33.5 achosion fesul 100,000 o'r boblogaeth)

Achosion profi: 821

Profion fesul 100,000 o'r boblogaeth: 223.8

Cyfran bositif: 17.4% (Cymru: 13.5% cyfran bositif)