05/04/22 

Cynhaliodd Caerdydd ŵyl Gerddoriaeth BBC Radio 6 dros y penwythnos gyda pherfformiadau gwych gan berfformwyr anhygoel mewn lleoliadau ledled y ddinas, gan gynnwys y Manic Street Preachers, Little Simz, Pixies, Idles, Johnny Marr, Father John Misty a llawer mwy.

Rhyddhaodd y BBC dros 12,000 o docynnau ar gyfer y digwyddiad hynod boblogaidd, gyda’r Ŵyl Ymylol dan arweiniad Cymru Greadigol yn cydlynu 150 o berfformwyr eraill o Gymru, i berfformio fel rhan o'r ŵyl ehangach.

I lawer, roedd yr ŵyl yn teimlo fel adferiad hirddisgwyliedig dyddiau gwych cerddoriaeth fyw ar ôl i'r pandemig orfodi cymaint o leoliadau i gau ac roedd y cyfryngau cymdeithasol ar dân gyda sylwadau cadarnhaol.

Mae'r ŵyl, a gynhaliwyd gyda chymorth Cyngor Caerdydd a Cymru Greadigol, yn cyd-fynd â strategaeth gerddoriaeth Caerdydd, sydd hefyd yn cefnogi arena 17,000 sedd newydd wedi’i chynllunio ar gyfer Glanfa'r Iwerydd, Bae Caerdydd, yn ogystal â'r uchelgais i ddatblygu gŵyl gerddoriaeth ryngwladol, i gyd â’r bwriad o weithio tuag at ddyhead Caerdydd i ddod yn Ddinas Gerdd sy'n cael ei pharchu'n rhyngwladol.