Caiff cyfres o argymhellion ar strategaeth digwyddiadau'r dyfodol yng Nghaerdydd ei thrafod gan y Cabinet yr wythnos nesaf.
Mae adroddiad y Cabinet wedi'i gyhoeddi ar wefan Cyngor Caerdydd mewn ymateb i ymchwiliad gan y Pwyllgor Craffu'r Economi a Diwylliant sy'n argymell y dylid derbyn 11 o 12 cynnig y pwyllgor, naill ai'n llawn neu'n rhannol, ac y dylid gwrthod un argymhelliad.
Dywedodd yr Aelod Cabinet dros Ddiwylliant a Hamdden, y Cynghorydd Peter Bradbury:"Nid damwain yw enw da rhagorol Caerdydd o ran cynnal digwyddiadau - mae'n ganlyniad i strategaeth hirdymor lwyddiannus i weithio ar y cyd â'n partneriaid ‘Tîm Cymru' i wneud Caerdydd yn ddinas flaenllaw o ran digwyddiadau.
"O ddigwyddiadau chwaraeon rhyngwladol mawr megis rownd derfynol Cynghrair y Pencampwyr a Chwpan Criced y Byd, i Uwchgynadleddau Ewropeaidd, cyfarfod NATO a chyngherddau a digwyddiadau diwylliannol ar raddfa fawr - mae Caerdydd yn gwneud y cyfan yn eithriadol dda.
"Ond rydym yn gwybod na allwn orffwys ar ein bri - mae'r farchnad fyd-eang ar gyfer cynnal digwyddiadau mawr yn ffyrnig gystadleuol, ac os ydym am barhau i adeiladu a chynnal ein calendr digwyddiadau wedyn mae angen i ni symud tuag at gymysgedd ehangach o ddigwyddiadau byd-eang, ynghyd â digwyddiadau cerdd a diwylliannol unigryw cynhenid a rhoi mwy o ffocws ar ddenu digwyddiadau a chynadleddau busnes."
"Mae digwyddiadau'n rhan o'r hyn sy'n gwneud Caerdydd yn ddinas fywiog ac maen nhw'n dod â manteision go iawn i economi'r ddinas, ond mae eu cynnal yn gostus iawn i'r Cyngor ac i'n partneriaid statudol."
"Yn unol ag argymhellion y pwyllgor rydym yn bwriadu parhau i lobïo am fwy o arian gan Lywodraeth y DU i helpu i dalu'r costau hyn. Fodd bynnag, er mwyn i Gaerdydd fanteisio ar holl fanteision economaidd hirdymor ein buddsoddiad mewn digwyddiadau, rydym angen i fusnesau weithio gyda ni a sicrhau bod Caerdydd yn parhau i fod yn gyrchfan fforddiadwy a deniadol i ymwelwyr."
"Mae gwaith ar lawer o argymhellion y Pwyllgor Craffu a Diwylliant eisoes ar y gweill ac rwy'n croesawu eu mewnbwn wrth i ni barhau i weithio ar ddatblygu ein strategaeth digwyddiadau i'r dyfodol."
Mae'r cynigion a argymhellwyd yn cynnwys:
Mae'r adroddiad hefyd yn argymell gwrthod cynnig i fynd ati i gynllunio rhaglen flynyddol y ddinas er mwyn gwella'r calendr a chynyddu nifer y digwyddiadau yn yr amser segur presennol.
Argymhellir gwrthod y cynnig ar y sail bod amseroedd digwyddiadau yn cael eu harwain gan y farchnad. Mae'r Cyngor eisoes yn gweithio gyda'i bartneriaid i fynd ati i gynllunio'r calendr blynyddol a theimlir na fyddai ceisio cyfyngu ar nifer y digwyddiadau ar amser penodol yn fasnachol ymarferol ac y byddai'n niweidiol - y nod yw denu mwy o ddigwyddiadau gydol y flwyddyn i gydbwyso'r calendr blynyddol yn well.